Գագիկ Ծառուկյանը՝ իշխանությունների հայտարարությունների վերաբերյալ կասկածներ է հայտնել

Այսօր, «Բարգավաճ Հայաստան» կուսակցության նախընտրական ցուցակը գլխավորող Գագիկ Ծառուկյանը հանրահավաքի ժամանակ հայտարարեց, որ Հայաստանը և Ադրբեջանը խաղաղություն չունեն։ Նրա խոսքով՝ իշխող թիմը, որը գլխավորում է Նիկոլ Փաշինյանը, ժողովրդին խաբում է։

«Նրանք պնդում են, որ ունեն խաղաղություն, բայց ես հարցնում եմ՝ որտե՞ղ է այդ խաղաղությունը։ Որևէ ստորագրված թուղթ չկա, որը կհաստատի այդ պայմանավորվածությունը։ Խաղաղությունը խոսքով չէ, այն պայմանավորվածություն է, որը պետք է ամրագրված լինի։ Թող իշխանությունները բոլորի ներկայությամբ ցույց տան այդ թուղթը»,– ասաց Ծառուկյանը։

ԲՀԿ առաջնորդը նշեց, որ Ալիևը դրել է պահանջներ, որոնք պետք է կատարվեն հերթականությամբ, և որ իշխանությունները պետք է դրանք կատարեն, ոչ թե խոսակցություններ վարեն։

Ծառուկյանը հարցադրեց նաև իշխանությունների այն հայտարարությունը, թե Եվրոպական Միությունը պատրաստ է ընդունել Հայաստանի ապրանքները։

«Եղբայր ջան, ամոթ է, սուտ եք ասում։ Դուք 8 մլրդ դրամ պարտք եք ավելացրել պետական բյուջեին, պարտքերի տոկոսները չեք կարողանում փակել։ Ո՞վ է վճարելու այդ արտահանողների պարտքերը, եթե դուք ինքներդ չեք կարողանում ձեր սեփականը վճարել»,– ընդգծեց նա։

ԲՀԿ առաջնորդը նաև հավելեց, որ իշխող թիմը միայն խոսքով է ընտրությունների գնում և որևէ կոնկրետ, հիմնավորված ծրագիր չի ներկայացնում։ Նրա խոսքով՝ 8 տարվա ընթացքում Նիկոլ Փաշինյանը չի կատարել իր նախընտրական որևէ խոստում։

Ծառուկյանը նաև նկատեց, որ ժողովուրդը վախենում է խոսել իր խնդիրների մասին, քանի որ վախենում է իշխանությունների վրեժխնդրությունից։

ՀՀ-ում հերթական խորհրդարանական ընտրությունները կկայանան 2026 թվականի հունիսի 7-ին։