ՀՀ փոխվարչապետը կարևորեց ԵԱՏՄ շրջանակում 3-րդ երկրների հետ առևտրատնտեսական կապերի դիվերսիֆիկացիան

Երևան, մայիսի 29-ին։ Եվրասիական տնտեսական բարձրագույն խորհրդի ընդլայնված նիստի ընթացքում ՀՀ փոխվարչապետ Մհեր Գրիգորյանը հայտարարեց, որ Հայաստանը շարունակելու է բարեխղճորեն համագործակցել ԵԱՏՄ-ի շրջանակում՝ հիմնված փոխադարձ հարգանքի, իրավահավասար գործընկերության և միության անդամ բոլոր պետությունների ազգային շահերի համապատասխանության սկզբունքների վրա։

Փոխվարչապետը նշեց, որ Հայաստանը առաջին անգամ չէ, որ ընդգծում է ԵԱՏՄ-ի շրջանակում փոխշահավետ համագործակցության հանձնառությունը՝ տնտեսական հավասարակշռության և տարածաշրջանի տնտեսական զարգացման կայունության շահերից ելնելով։

Նիստի ընթացքում քննարկվող թեմաներից մեկը, ըստ Գրիգորյանի, արհեստական բանականության ոլորտում տնտեսությունների մրցակցության բարձրացումն է։ Նա կարևորեց այս տեխնոլոգիայի դերը միության անդամ պետությունների տնտեսությունների ինքնիշխանության ամրապնդման գործում։

ՀՀ փոխվարչապետը նաև անդրադարձավ ԵԱՏՄ-ի շրջանակում 3-րդ երկրների հետ առևտրատնտեսական կապերի դիվերսիֆիկացման հարցին՝ կարևորելով ազատ առևտրի գծով գործող համաձայնագրերը և նոր երկրների հետ բանակցությունները։ Նրա խոսքով՝ այս գործընթացում առանցքային է տրանսպորտային կապերի դիվերսիֆիկացիան, որը, իր հերթին, կնպաստի առևտրաշրջանառության զգալի աճին։

Անդրադառնալով ագրոարդյունաբերության զարգացմանը՝ Գրիգորյանը նշեց, որ Հայաստանը մեծ կարևորություն է տալիս այդ ոլորտում համագործակցությանը և ողջունում է կոոպերատիվներին ֆինանսական աջակցություն նախատեսող արձանագրության ստորագրումը։ Նրա համոզմամբ՝ այս քայլը կնպաստի արդյունաբերական անվտանգության բարձրացմանը։